Серафима Марковна Люлякина " Тиринь Мастор"⁠⁠

Тиринь мастор, монь вечкевикс велем.
Таго инжекс течи сынь тонеть,
Таго лымбить паксятне икелем,
Венстить чувтнэ тарадост, прок кедть.
Вана совинь эсень тиринь кудов.
Тесэ касынь ды эйкакшон тринь.
Мерят, эсь отксчизэнь понгинь одов,
Мерят, эйкакш пингеван ютынь.
Вальмало — рацяня умарь чувто.
Озавтыя сонзэ мон умок.
Эсь прянзо комавтни варманть увтсо,
Истя монень кучи сюкпря прок.
Стамбарнэ молян келей ульцяват,
Сонзэ эйс сыть эрьва ёндо кить.
Тевень вечкий эрзянь цёрат, ават
Монень кеме шумбрачи арсить.
Тиринь мастор, монь вечкевикс велем,
Велькскат уить сэняждыця пельть.
Тантей кшисэть витик тон седеем,
Моронь морамс максыть монень мельть.
Моран эйстэть, ине теветь славан,
Ламо иеть гайги вайгелем,
Зярс саты монь вием — а лоткаван
Морамодо тонь эйстэ, велем.